Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 19.282 | Dem. 19.286 (English) | >>Dem. 19.289 |
19.285νὴ Δίʼ , οἱ νέοι γὰρ ἡμῖν διʼ ἐκεῖνον ἔσονται τὸν ἀγῶνα βελτίους . οὐκοῦν καὶ διὰ τόνδʼ οἱ πολιτευόμενοι , διʼ ὧν τὰ μέγιστα κινδυνεύεται τῇ πόλει · προσήκει δὲ καὶ τούτων φροντίζειν . ἵνα τοίνυν εἰδῆθʼ ὅτι καὶ τοῦτον ἀπώλεσεν , τὸν Τίμαρχον , οὐ μὰ Δίʼ οὐχὶ τῶν ὑμετέρων παίδων , ὅπως ἔσονται σώφρονες , προορῶν (εἰσὶ γάρ , ὦ ἄνδρες Ἀθηναῖοι , καὶ νῦν σώφρονες · μὴ γὰρ οὕτω γένοιτο κακῶς τῇ πόλει ὥστʼ Ἀφοβήτου καὶ Αἰσχίνου σωφρονιστῶν δεηθῆναι τοὺς νεωτέρους ),
19.286ἀλλʼ ὅτι βουλεύων ἔγραψεν , ἄν τις ὡς Φίλιππον ὅπλʼ ἄγων ἁλῷ ἢ σκεύη τριηρικά , θάνατον εἶναι τὴν ζημίαν · σημεῖον δέ · πόσον γὰρ ἐδημηγόρει χρόνον Τίμαρχος ; πολύν . οὐκοῦν τοῦτον ἦν Αἰσχίνης ἅπαντʼ ἐν τῇ πόλει , καὶ οὐδεπώποτʼ ἠγανάκτησεν οὐδὲ δεινὸν ἡγήσατʼ εἶναι τὸ πρᾶγμα , εἰ ὁ τοιοῦτος λέγει , ἕως εἰς Μακεδονίαν ἐλθὼν ἑαυτὸν ἐμίσθωσεν · λέγε δή μοι τὸ ψήφισμα λαβὼν αὐτὸ τὸ τοῦ Τιμάρχου .ὁ μὲν τοίνυν ὑπὲρ ὑμῶν γράψας μὴ ἄγειν ἐν τῷ πολέμῳ πρὸς Φίλιππον ὅπλα , εἰ δὲ μή , θανάτῳ ζημιοῦσθαι , ἀπόλωλε καὶ ὕβρισται · ὁ δὲ καὶ τὰ τῶν ὑμετέρων συμμάχων ὅπλʼ ἐκείνῳ παραδοὺς οὑτοσὶ κατηγόρει , καὶ περὶ πορνείας ἔλεγεν , ὦ γῆ καὶ θεοί , δυοῖν μὲν κηδεσταῖν παρεστηκότοιν , οὓς ἰδόντες ἂν ὑμεῖς ἀνακράγοιτε , Νικίου τε τοῦ βδελυροῦ , ὃς ἑαυτὸν ἐμίσθωσεν εἰς Αἴγυπτον Χαβρίᾳ , καὶ τοῦ καταράτου Κυρηβίωνος , ὃς ἐν ταῖς πομπαῖς ἄνευ τοῦ προσώπου κωμάζει . καὶ τί ταῦτα ; ἀλλὰ τὸν ἀδελφὸν ὁρῶν Ἀφόβητον . ἀλλὰ δῆτʼ ἄνω ποταμῶν ἐκείνῃ τῇ ἡμέρᾳ πάντες οἱ περὶ πορνείας ἐρρύησαν λόγοι .
Ψήφισμα
19.287
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 19.282 | Dem. 19.286 (English) | >>Dem. 19.289 |